Onde está???

vista do ies de pastoriza

A aplicación PlaceSpotting é un xogo baseado en Google map na que cada usuario propón unha imaxe dun lugar real en calquera parte do mundo para ser localizado a partir dunha serie de pistas.

Teredes que movervos no mapa arrastrando e aplicando zoom ate dar co lugar preciso. Probade a solucionar algunha das propostas ou a crear unha nova. Cal é a da imaxe???

Grávoche unha cinta?

O de compartir a música cos amigos non é nada novo, os soportes que utilizamos, afortunadamente si. O post de hoxe ten un certo toque de nostalxia e seguramente arrincará un sorriso a todos os que medramos gravando a nosa música da radio en cintas coma a da imaxe. Permitídeme que vos conte un pouco como era aquilo antes de presentarvos esta aplicación pero podedes facer clic na imaxe para poñer música de fondo…

 

Así como agora todos tedes un mp3 os que nacimos nos anos 70 tiñamos, no mellor dos casos, un walkman para reproducir as cintas de audio. Este walkman tiña un motor alimentado con pilas que se encargaba de mover os cabezais de lectura. Algúns destes aparatos non regulaban ben a velocidade de lectura, de maneira que cando as pilas estaban novas, a música soaba a maior velocidade da que debera. Por outro lado, as pilas non se esgotaban de golpe, senón que o ían facendo pouco a pouco de maneira que a música soaba cada vez a menor velocidade. O efecto era coma se nas primeiras cancións cantaran os pitufos, os intérpretes orixinais nas cancións do medio, para rematar coa nena do Exorcista interpretando os últimos temas.

 

Naqueles anos as pilas eran salinas, que duraban moitísimo menos que as alcalinas das que hoxe dispoñemos, polo que todos nós optabamos por rebobinar as cintas a man empregando o casquillo dun boli bic. A diferencia dos mp3, non era posible acceder de forma instantánea a unha canción determinada, pero coa práctica acababas por saber a que altura da cinta estaba cada canción.

 

As cintas magnéticas eran en xeral moi robustas e soportaban ben as caídas e outros avatares como as moitísimas veces que as gravabamos e borrabamos, pero pobre do que esquecera unha dentro dun coche exposto ao sol porque normalmente aquilo non tiña remedio. Tamén sucedía que ás veces o aparato trillaba a cinta magnética chegando a rompela e entón había que botarlle imaxinación para recompoñer aquel pequeno desastre. As solucións máis habituais eran aplicar un pouquiño de verniz de uñas entre os dous anacos ou unilos con celo. No primeiro caso corrías o risco de que se soltara de novo e no segundo, cando o reproductor chegaba a ese punto, había que pasar a cinta a man, pois o motor non era capaz de arrastrala. En calquera caso, perdías, obviamente, a parte da canción onde os anacos se solapaban.

 

A pesar de todo isto, todos nós disfrutabamos moitísimo gravándonos cintas entre colegas que normalmente titulabamos con cousas como VARIOS 1985. É por iso que cando hoxe vin esta aplicación en What’s New non puiden resistir a tentación de escribir este post.

 

Mixwit é basicamente un reproductor de mp3 coa apariencia das cintas magnéticas de entón. Trátase de facer unha selección de música a partir de cancións dispoñibles na rede. Poderás escoller a carátula ou variar o estilo e unha vez finalices, xeraráse unha dirección que podes pasar aos amigos para compartir con eles a túa música ou incrustar o reproductor no teu blog como fixen eu. Podes rexistrarte se queres gardar as túas creacións e modificalas posteriormente, pero non é necesario.

E contaminación lumínica no mundo

contaminacion luminica no mundo

Seguro que logo de ver o mapa da contaminación lumínica na península non erades capaces de comezar as vacacións de Semana Santa sen saber como é a distribución no mundo, verdade? 🙂
Pois dádelle as gracias ao responsable de Astronomía na Beirarrúa que hoxe me deixou esta impresionante imaxe no meu buzón (facede clic na imaxe para vela máis grande). Trátase dunha foto real, composta a partir de moitas tomas individuais, que nos indica onde é máis difícil ver estrelas. Vedes algunha relación co nivel de desenvolvemento dos países?

Boas vacacións para todos vós!!!

Contaminación lumínica na península

contaminacion luminica na peninsula

Non é a primeira vez que falamos da contaminación lumínica neste blog e hoxe amosamos o mapa da contaminación lumínica na península ibérica que nos chega vía ecomicrosiervos. A pesar de estar elaborado en base a cálculos e non a observación directa, dá unha boa idea de cal é a realidade.

Sabede que nas zonas máis contaminadas, aquelas que no mapa aparecen en branco e vermello, só poderiamos distinguir un máximo de 150 estrelas nunha noite despexada, mentres que nas zonas menos contaminadas (azul escuro e negro no mapa) poderiamos superar as 3000 estrelas.

Deberiamos ser capaces de atopar o equilibrio entre unha iluminación urbana aceptable e un nivel de contaminación lumínica baixo. Que ideas se vos ocurren? Pensades que os farois que iluminan as rúas están ben deseñados?

Día Mundial da Eficiencia Enerxética

bombilla desenchufandose

Sabiades que o día 5 de Marzo é o Día Mundial da Eficiencia Enerxética? Acabo de lelo en ecomicrosiervos e tamén que se levarán a cabo iniciativas tan interesantes como o troco de lámpadas de incandescencia por lámpadas de baixo consumo (sabedes que porcentaxe do gasto eléctrico nun fogar é debido á iluminación?).

Temos que ser capaces de manter a nosa calidade de vida cun menor custo enerxético e iso pasa por un mellor aproveitamento dos recursos. O obxectivo: reducir a contaminación, prolongar a vida dos recursos e poñer o noso gran de area para frear o cambio climático.

Como exercicio, propóñovos que cada un de nós revise os seus hábitos e adique cinco minutos a pensar como pode consumir menos enerxía.

Telefonía ecolóxica

bateria de mobil con placa solar

Cada vez que cambiamos de teléfono móbil adoitamos desfacernos do vello e de todos os seus compoñentes e accesorios. Con esta práctica tan habitual, estamos xerando residuos que ademais no caso das baterías, son altamente contaminantes.

En países como Xapón xa toman medidas como por exemplo que os cargadores de móbil sexan universais, é dicir, que sexan válidos para todos os modelos de móbiles e desta forma ao cambiar de teléfono non é necesario cambiar o cargador.

Entereime hai uns días vía No puedo creer que lo hayan inventado dun novo accesorio que se comercializa nese país. Trátase dunha placa solar que por exemplo podes pendurar do teu móbil, de maneira que se vai cargando ao longo do día proporcionando 35 minutos de batería logo de 6 horas de carga.

Xa sabemos que 35 minutos dan para moi pouco e que a carga da placa é lenta, sen embargo é un bo comezo na percura de alternativas e unha solución de emerxencia estupenda para cando quedamos sen batería no momento menos oportuno.

Tecnoloxía + reciclaxe

mobil nokia fetio con material de refugallo

O teléfono da imaxe acaba de ser presentado na Mobile World Congress e a súa importancia radica en que está construído maiormente con materiais de refugallo: a carcasa de aluminio procede de latas de refresco, as teclas están fabricadas con pneumáticos de coche e moitos dos elementos de plástico que presenta proveñen de botellas.

Aínda non se comercializa, pero ademais de ser unha interesante declaración de intencións é unha proba de que é posible lanzar un producto competitivo e respectuoso co medio ambiente. Podedes presumir de que nós levamos anos facendo isto no taller de Tecno 🙂

Vía ecomicrosiervos

Oculta mensaxes en imaxes

logo de cryptimg Vía a sempre interesante What’s New chéganos Cryptimg, unha aplicación que permite ocultar mensaxes nunha imaxe. Seleccionade a imaxe, asignade un contrasinal e escribide a mensaxe que queredes ocultar. Premendo no botón Codificar, xérase unha imaxe idéntica en apariencia á orixinal pero contendo a información segreda. Xa está lista para ser enviada ao seu destinatario a través do correo electrónico, por exemplo (asegurádevos de que a persoa que recibe a imaxe coñece o contrasinal).
O receptor da imaxe terá que gardala, subila na páxina de Cryptimg, teclear o contrasinal, darlle ao botón Descodificar e no cadro de texto aparecerá a mensaxe oculta.

Probade con esta imaxe e o contrasinal tecno, a ver que vos sae…

mans suxeitando unha bombilla
Que agardades para probar???

Contaminación lumínica

foto da contaminacion luminica en Tenerife

A contaminación lumínica é sempre a grande esquecida cando se fala de impacto medioambiental, sen reparar no despilfarro enerxético que supón ou en como reduce de forma considerable a visibilidade do ceo nocturno.

Na defensa da calidade do ceo nocturno como dereito científico, cultural e medioambiental da Humanidade existen iniciativas a nivel internacional como Star Light.

Sabedes que é posible determinar o nivel de contaminación lumínica da vosa cidade simplemente contando estrelas? Visitade a páxina de Great World Wide Star Count e participade na convocatoria que se celebrará no Outono do presente ano.

A imaxe é unha fotografía tomada en Tenerife que nos presenta o blog sobre ecoloxía e medioambiente

logo de ecomicrosiervos

A auga, aplicacións enerxéticas na Galicia preindustrial

frontal de A auuga, aplicacions enerxeticas na Galicia preindustrial

Achégovos o enlace ao 1º premio na modalidade de materiais curriculares web no marco do concurso que anualmente convoca a Consellería de Educación e Ordenación Universitaria. Trátase dunha páxina na que se aborda o estudio da auga dende diferentes puntos de vista e se analiza o seu papel na Galicia preindustrial.
Cando rematedes a vosa visita a esta web poderedes comprobar os vosos coñecementos coas actividades que se propoñen.
Noraboa aos creadores deste recurso!!!