Display de 7 segmentos controlado con PICAXE

A práctica proposta para hoxe foi a seguinte: deseñar un circuíto e un programa que permitiran controlar a través de PICAXE o funcionamento dun display de 7 segmentos que debía conmutar entre 1 e 3 ao accionar un final de carreira. Todo un reto para o que todavía sobraron 10 minutos que nos permitiron gravar o funcionamento dos dispositivos. Un traballo estupendo!

Podedes ver outro vídeo máis na canle de YouTube.

Tomando medidas XI: Xogamos coas escalas

Se a Terra fora un balón de baloncesto e a Lúa unha pelota de tenis, que distancia debería separalas para manter a escala empregada nos diámetros?

Onte vin este vídeo en amazings e hoxe realizamos unha pequena práctica na clase de Ámbito Científico-Técnico (dentro das actividades relacionadas con astronomía que estamos desenvolvendo ao longo desta avaliación).

A partir da wikipedia, @s alumn@s buscaron os seguintes datos:

  • Diámetro da Terra
  • Diámetro da Lúa
  • Diámetro dun balón de baloncesto
  • Diámetro dunha pelota de tenis

Logo de comprobar que os diámetros balón de balocesto-pelota de tenis gardaban a mesma relación (aproximadamente) ca os diámetros Terra-Lúa e que polo tanto estaban ben escollidos, pedinlles que buscaran que distancia media separa o noso planeta do seu satélite.

Xa só quedaba calcular o factor de escala Terra-balón de baloncesto e empregalo para determinar a que distancia do balón de baloncesto teriamos que colocar a pelota de tenis. O (sorprendente) resultado, arredor de 7 metros.

Por certo, no vídeo observaredes que a persoa que camiña para situar a pelota de tenis na súa posición correcta, dá 10 pasos. Se os seus pasos foran amplos, tería dado arredor de 7 porque o paso amplo dunha persoa adulta de estatura media mide arredor de 1 metro.

Inversión de xiro dun motor con PICAXE

@s aliumn@s de 4ºA realizaron hoxe en tempo récord un pequeno programa para controlar a inversión de xiro dun motor. A minipráctica consistía en facer que xirara durante 5s en sentido de avance para xirar a continuación no sentido contrario durante 8s. O cartón pegado no eixe do motor permite visualizar mellor o cambio de sentido (como indicador, non é moi elaborado, pero o tempo non dou para máis 🙂 )

Un xogo con Lego para unha tarde de luns

Na clase do luns de robótica construímos e programamos sistemas en lazo pechado que incorporaban un sensor de luz. As instrucións de programación fan que o robot xire ate que atopa unha luz, momento no que avanza en liña recta durante cinco segundos, bucle que se repite ate apagar o robot.

Propuxemos un xogo: levar o robot dende unha marca inicial no taller ao interior dun recadro só coa axuda dunha lanterna. Un cronómetro en marcha situado na PDI debía ser pulsado tras alcanzar o obxectivo. Máis vídeos na canle de YouTube.

Comezamos con PICAXE

@s alumn@s de 4ºA terán que deseñar e contrruír un dispositivo controlado a través de PICAXE como proxecto para esta avaliación. Antes, é necesario entender o funcionamento deste sistema de control e aprender a programalo. Hoxe fixemos a primeira práctica deseñando o circuíto para un semáforo e programando o seu funcionamento:

A luz vermella debía permanecer acendida 5 s, a continuación a luz amarela acenderíase 1 s e para rematar, a luz verde estaría 5 s acendida. Os catro grupos resolveron a práctica correctamente e todavía tivemos tempo para gravar os resultados. Déixovos aquí un dos catro vídeos que tomamos e os outros tres podedes velos na canle de YouTube.

Parabéns a tod@s!!!

Seino, a calidade do vídeo é malísima 🙁

E por fin… as fotos do día dos foguetes!

A febre e unha dor de gorxa tremenda non deixaron que hoxe fora ao instituto, así que aproveitei o tempo para facer unha montaxe con algunhas das moitísimas fotos que tiramos o día dos foguetes. Que día!

NOTA: acepto cambios na selección de fotos e música 🙂

Foguetes de auga (4ºD Ámbito Científico-Técnico) on PhotoPeach

Primeiro vídeo do lanzamento de foguetes de auga!!!

Unha pequena mostra (tede paciencia e haberá máis) da xornada de foguetes de auga que tivemos esta mañá. Trátase do lanzamento do foguete construído polos alumnos de 4ºD. As dúas gravacións correspóndense con dúas cámaras, unha na base de lanzamento e outra situada para rexistrar a traxectoria completa do foguete. Un traballo estupendo. Parabéns a tod@s!!!

A mecánica do Universo (I)

Comezamos esta unidade co visionado dun programa especial de Mythbusters acerca da suposta teoría da conspiración arredor da chegada do Home á Lúa. Podedes descargar o vídeo que vimos e analizamos en clase ben dende a aulateca, ben facendo clic aquí. O exercicio que vos propoño é o seguinte:

  1. Escollede 2 probas da teoría da conspiración
  2. Explicade en que consiste cada unha delas
  3. Describide o experimento que se prantexa para refutar cada unha das probas
  4. Analizade as conclusións que se poden obter dos experimentos, valorando se as probas presentadas son válidas.

pegada_aldrin

Primeiras probas cos foguetes de auga

Vídeo que documenta as primeiras probas cos foguetes de auga. Como o tempo non se prestaba moito, fixémolas dentro do taller e sen agua, claro. Cada quen puido afacerse á tarefa que terá que realizar o día do lanzamento, e de paso aproveitamos para probar varios materiais nos que cravar a agulla da bomba de aire.

Se queredes ver un par de vídeos máis, visitade a canle de YouTube do blog. Nun deles a presión foi insuficiente polo que o voo foi moi curto. No outro, fixemos un lanzamento vertical no exterior aproveitando un momento no que non chovía, pero si facía bastante vento. Todos eles foron soamente con aire a presión. Os lanzamentos con auga e con cámara de vídeo incorporada no foguete, serán a semana que vén.

Xogo de preguntas e respostas

Vídeo do proxecto que @s alumn@s de 2ºC do grupo verde construíron na primeira avaliación. Trátase dun xogo eléctrico de preguntas e respostas que lles permitiu practicar o traballo con madeira ademais de repasar contidos de electricidade. Nos próximos días subirei fotos de todos os proxectos rematados.